KUCHING, 16 Mei: Sarawak deka nguji nempa ‘Malaysia Book of Records’ (MBOR) iya nya achara betanda ngena pekayan etnik di Waterfront Kuching, Hari Minggu tu.
Ku Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, raban sida ngarapka lebih 1,000 penyereta ngambi bagi ba achara nya tu deka dipenyadika Premier Sarawak Datuk Patinggi Tan Sri Abang Johari Tun Openg.
“Ngena pekayan etnik ba pengawa betanda ti dilanggur. Nya mandangka pengelantang kelimpah dikena nempa rikod. Nya endang pengerami pesaka budaya dunya sereta pesaka budaya nyelai Malaysia ti macham ragam sereta kaya. Sarawak empu endang rumah ngagai 34 gerup etnik ke bebida,” ku iya.
Iya madah munyi nya ba aum media pasal achara betanda ti berambaika jaku ‘Warna Keharmonian’ di Bilik Media Begunan Kunsil Nengeri (DUN) Sarawak ditu, kemari.
Achara nya diatur Rotary Club of Kuching begulai enggau Diwan Bandaraya Kuching Utara (DBKU).
Tandu iya, achara nya mega deka mandangka penyerakup dalam mayuh bansa sereta peluang begempuru ukai kediri tang nyadi siti gerup ke ngerami enggau bebasaka budaya enggau adat pangan diri.
Mensia mayuh ke bisi ati masuk achara tu ulih rejister ba palan program nengah chara ngena pekayan etnik diri empu. – TVS
