BINTULU, 13 Mei: Main elektronik tauka dikumbai e-Lumba endang sebengkah main ke chukup dikerindu kemaya hari tu, lebih agi raban rebak baru enggau nembiak.
Menteri Dagang Temuai, Seni enggau Main Asal (MOTAC) Dato’Seri Tiong King Sing madah, main nya ukai semina aktiviti dikena ngisi maya lepa, tang mega nyengkaum ngagai siti jeman profesionalisme ba raban peminat iya empu.
“Beduduk ari nya, aku nesau semua raban terus nyukung pengerembai industri e-Lumba lebih agi main digital dalam tali arus.
“Nengah pemisi sukung ari perintah enggau pelanja ari serikat korporat, aku andal e-Lumba deka terus mansang enggau raban nembiak ba menua tu ulih bebendar nyentuk nyadi pemain profesional,” ku iya.
Iya madah munyi nya dalam teks jaku ke dibacha pengari iya, Pegawai Khas Parlimen Bintulu, Steven Kong Kai Seng ba Pengerami Nutup Pekit PUBG Trofi YB Dato Sri Tiong King Sing ba sebuah hotel ditu, kemari.
Berebak enggau nya, iya mega ngelalau bala pemain e-Lumba ngambika enda kelalu terunda-runda rindang bemain nyentuk enda ingatka tanggungpengawa diri enggau ngenataika penanggul sereta isu dudi hari-TVS
