Bemacham chara dipejalaika perintah dikena ngelengkaska agi program betuchuk vaksin di menua tu.
Program bas betuchuk vaksin mindah kin kitu udah nyapai juluk deka meransang mayuh agi peranak di Sibu datai betuchuk vaksin COVID-19.
Ku chairman SUPP pampang Bawang Assan, senator Robert Lau Hui Yew madah batang tuju bejalaika servis tu iya nya dikena meri servis ngagai sida ti enda ulih datai ngagai palan betuchuk vaksin (PPV).
Nya alai, lebuh bas tu datai ke genturung pendiau tauka ngagai kandang endur sida, nya ulih meransang sida deka betuchuk vaksin.
Ku iya madah, perengka pengangkut baka servis tu sigi engkeman dikena laban ulih tama ke kandang menua ti jauh sereta jalai ti mit.
Ku iya nambah agi, sepenyampau 300 peranak ari rumah panjai enggau di begunan flat ditagit deka nerima tuchuk vaksin minggu baru tu ila.
Kelimpah ari nya, ku iya nandu, tuju servis mega kena ngemuntangka mensia mayuh betuchuk vaksin ngagai sida ti tinggal maya betuchuk vaksin.
Berindik ari nya, iya deka bekerejasama enggau Kejiranan Rukun Tetangga (KRT), Komiti Pemansang Enggau Pengelikun Genturung Pendiau (JKKK) sereta organisasyen di kandang menua nya ngiga peranak ti bedau betuchuk vaksin.
