KUCHING, 11 Mei: Kaban Kunsil Nengeri (ADUN) Engkilili Dr Johnical Rayong Ngipa nyemetak madah diri nadai masuk champur bekaul enggau isu ngetuka 12 tuai rumah enggau dua kapitan di sitak Kunsil Nengeri Engkilili baka ke udah dikerembai ba sebengkah surat kabar lokal empai lama.
Ku Dr Johnical iya nadai kala ditanya raban ke bekaul pasal pengawa ngetuka raban KMKK nya.
“Pengawa ngetuka sida tu nadai kaul enggau aku ke nyadi ADUN Engkilili.
“Aku nadai kala ditanya sapa-sapa dalam nentuka pemutus tu, pia mega aku enda kala dilawa endur meri penemu pasal pengawa nyiri (KMKK) tu.
“Enti aku bisi (ditanya) tentu aku merambu anang ngemaduka sapa-sapa nyadi Tuai Rumah, Tuai Genturung Pendiau, kapitan enggau ke bukai laban nyema kitai ngetuka sida nya deka betingkah enggau pilih JKKK sereta pilih nembiak redak nengah JKKK,” ku iya.
Iya mansutka timbal nya ba Kompleks DUN Sarawak kemari lebuh dipinta meri timbal pasal jaku tuduh sekeda orang ke ngumbai iya bisi kaul enggau isu ngetuka 12 tuai rumah enggau dua kapitan ba DUN Engkilili sebedau tu.
Nandu pasal pekara nya Dr Johnical madah pekara nya udah dikerandau enggau raban ke lebih bekuasa lalu iya andal pekara nya deka teputar enda lama agi.
Sebedau tu, Gerempung Tuai-Tuai Rumah Engkilili ngangkaika ulah sekeda orang ke ningkilka sekeda tuai rumah enggau kapitan di Engkilili enggau nadai sebarang surat kebuah ngujungka nerima bemacham timbal ari mensia mayuh ba media rama.-TVS
