KUCHING, 18 Julai: Opis Orang Indu Enggau Ruang Bilik Sarawak (JWKS) diperambu deka ditumbuhka di Sri Aman ba baruh Opis Menteri Pengelantang Raban Bansa, Orang Indu, Ruang Bilik enggau Pemansang Anak Mit (KWKPK).
Penumbuh JWKS pelasar dikena negapka tanggungpengawa orang indu enggau ruang bilik.
Kaban Council Nengeri (ADUN) Simanggang, Datuk Francis Harden Hollis madah, perintah nengeri nengah JWKS ngembuan juluk deka nempa raban indu ti chakah besemekih sereta regas seraya ulih nyungkak pemansang sosio ekonomi.
Tu ngayanka komitmen perintah nengeri bebendar deka meri servis pemadu manah ke pengelantang rayat.
“Penumbuh opis nya meri reti ti chukup besai sereta bisi tanggungpengawa ke udah ditetapka seriris enggau tuju penumbuh JWKS.” ku iya.
Harden ke mega Menteri Muda Pengelantang Komuniti madah, bisi lima buah stesyen JWKS udah beoperasyen di Kuching, Serian, Sarikei, Sibu enggau Bintulu naka ke diatu.
Kelimpah ari nya, muka Women Skills Training (WST) @bahagian baka kursus bejait, kulinari enggau bidang penganta dikena ngansah pengelandik ba raban indu nitihka bagi menua di Sarawak.
Tu nyengkaum numbuhka Wisma Wanita Training Centre (wwtc)/wwtc online ti bisi muka kursus kulinari, kursus kecantikan enggau kursus spa & urut ngagai raban indu.
Dikena ngemudahka mensia mayuh ngulihka servis lalau enggau bantu, opis JWKS mega bisi nyendiaka servis JWKS helpline dalam mantu bekaul isu kes nyamah orang indu enggau nembiak mit.
