TAJA pan benung napi pengekai igi penyakit COVID-19, pengawa nyaguka adat enggau main asal tetap dikemeranka seraya deka terus diintu ngambika enda rarat ditabanka arus pemansang sereta ubah dunya.
Beduduk ari nya, bemacham pekit ulih diatur nguna chara dalam tali arus laban diatu program ti ngaul mensia mayuh begelumu bedau dikemendarka perintah.
Siti ari pekit ke benung ranchak diatur dalam tali arus diatu iya nya Pekit Keling Kumang Piala YB Christopher Gira Sambang.
Beduduk ari nya, Kaban Kunsil Nengeri Tamin, Christopher Gira madahka iya enggau raban komiti ngatur pekit nya tetap seati, ransing sereta gagit ati deka ngatur pekit nya ti ulih nyerakup bansa kitai taja pan enda sama pelilih menua tauka alai endur diau.
“Nyadi tu pengawa ke manah diatur dikena kitai mandangka pemanah ngepan kitai Iban sekalika ngepan lelaki tauka indu. Pia mega, nengah program baka tu raban nembiak rebak baru bulih penemu senentang adat enggau main asal kitai. Nengah awak tu aku deka meri puji ngagai semua raban komiti ke ngemujurka pekit tu diatur,” ku iya madah nengah laman Facebook iya empu maya hari lima.
Iya mega pechaya raban komiti tu entara sida ke endang landik ba dalam bidang tu sereta ulih ngemujurka pekit ke diatur nya.
Berebak ari nya, ba pemutus pekit renggat ti keterubah bisi 20 iku pesereta mujur masuk ke renggat udah tu tauka semi final.
Nitihka penerang ari facebook, tetiap iku ari pesereta diberi tanggung pengawa ngaga siti video catwalk sepengelama tiga minit lalu ba dalam video nya sida mesti bisi nepu penetap ke udah ditaga raban komiti.
Tuju video nya digaga iya nya dikena nentuka mak 30 peratus undi ari mensia mayuh lalu 70 peratus ari raban akim profesional.
Tu mega dikena nentuka top 10 iku keling enggau top 10 kumang masuk ke renggat final tauka kepenudi.
Kelimpah ari nya, ari video nya sida deka dipilih sapa bagi bujang sigat enggau dara bajik ke ulih nangkup gelar Ngepan Pemadu Manah, kategori Keling enggau Kumang.
Mensia mayuh ke deka nemu penerang silik pekit tu seretapenetap ke mesti diselitka ba dalam video nya ulih ngelawa laman facebook Pekit Keling Kumang Piala YB Christopher Gira Sambang 2021.
