KUCHING, 4 Mei : Raban komuniti Dayak patut meri sukung penuh dikena ngemujurka Pengerami Gawai Renggat Nengeri Sarawak taun tu.
Presiden Gerempung Bansa Dayak Sarawak (SDNU), Tan Sri William Mawan Ikom madah taun tu gintir bansa Bidayuh nyadi tuai rumah pengatur pengerami nya seraya disukung SDNU enggau semua komuniti Dayak.
Beduduk ari nya, ku William Mawan genap pengerami ke ngaul komuniti Dayak patut dikemujur begulai laban nya nyadi lambang penyerakup ti ngemegahka bansa Dayak lebih agi di Sarawak.
“Nyadi Gawai kitai (Dayak) nyau ka datai nyadi aku ngarap ke taja kitai tu tadi bisi ngachir pendiau kitai anang enda enggau orang nirika Gawai Renggat Nengeri.
“Taun nyin suba ungkup kitai (Iban) nyadi taun tu enggi Bidayuh.
“Nyadi pelaba aku udah tu ila utai nya baru begintir-gintir.
“Nya alai, enti kitai megai pengawa baka nya megai pengawa sebaka ngau pangan diri pengawa bebatang ngintu pengerami ke bersangkut paut enggau kitai Dayak enda tau enda mujur,” ku iya.
William Mawan madah munyi nya maya bejadika Pengerami Pemakai Gerempung Bansa Dayak Sarawak ba Rumah Dayak di Satok, kemari.
Pengerami Pemakai SDNU di Rumah Dayak diatur pengelama tiga hari berunggu berengkah 3 nyentuk 5 Mei tu.
Pengerami nya deka digembar enggau bemacham program bukai baka pekit belagu, pekit tuak enggau nyabut tikit benasit.-TVS
