KUCHING, 16 Julai: Isu pengelikun garis entara menua Malaysia-Indonesia entara pekara ti dikemerat dikena nagang penama peranak menua luar ti nadai pemendar (PATI) lebih agi ba timpuh pengekai pandemik Covid-19.
Kebuah besai penama PATI ke Sarawak iya nya ketegal imigran ekonomi ngiga kereja ba mayuh bengkah sektor ladang enggau kereja kunterik.
Menteri Muda Pengelantang Komuniti, Datuk Francis Harden Hollis madah, bisi tiga kandang endur jalai pati ke patut diberi perati.
Entara kandang endur ke dipechaya jalai PATI iya nya Kampung Titikah, Sungai Putong enggau Temiang.
“Di Kampung Titikah endur ke dijaga PGA enda engkeman laban semak rumah panjai lalu ukai ba garis entara menua. Bagi Sungai Putong Enggau Kampung Temiang patut ditumbuhka pos nyaga tetap garis entara menua ngambika permit sementara meraka garis entara menua ulih diatur,” ku iya lebuh penemuai rasmi ngagai IPD Sri Aman, kena Hari Empat.
Ku iya madah, endang patut besedia tumu laban Indonesia merambu deka mindahka indukota Jakarta ke Kalimantan Barat ti ulih meri risiko penama pati ke Sarawak.
Ba awak ke sama, ku tuai pampang khas pelilih, Asp Jorasan Chawat lebuh meri licha sentang isu pengelikun madahka jalai chit ba garis entara menua meri pemar nagang penama pati.
Tu laban, mayuh sida ditemu tama nengah jalai chit laban deka ngulihka barang ke diguna ninting hari enggau bisi sekeda datai nemuai ngagai bala kaban belayan di nengeri tu.
