SPAOH, 28 April: Projek Ngaga Jematan Sungai Paku di Spaoh ke nguna kos penyampau RM36 juta ditaga tembu pun taun 2025.
Sapit Premier Sarawak Datuk Amar Douglas Uggah Embas madahka, pemansang pemadu baru projek nya ba tikas mantupka ati pengudah napi sekeda penanggul sebedau tu ke ngaul pengawa nukar kunteriktor ti ngasuh pengawa ba taba projek nyau tejanggal.
“Jematan Spaoh lama udah ba dia nyau semak dua taun. Tang, diatu kitai udah nerima berita manah pengudah udah nyiri kunteriktor baru.
“Nya alai, kitai sama ngarapka projek jematan tu ulih tembu ba pun taun 2025 pengudah kitai udah ngambi kunteriktor baru ngaga projek nya,” ku iya.
Iya mansutka jaku nya rambau Program Ramah Tamah Aidilfitri Kampung Spaoh 2024 kemari.
Nangkan ke nya, Uggah ke mega Menteri Infrastruktur Enggau Pemansang Penyangkai Kapal nerangka pasal status pemansang dua agi projek mega di Spaoh iya nya Projek Ngaga Padang Bilun Menasan Pandak (STOLport) enggau Projek Ngaga Palan Ngumpul, Nginjin Sereta Mungkus Produk Kebun (CPPC) di Bebuling diatu udah tembu manggai 54.3 peratus enggau 42 peratus.
Nitihka rikod, projek STOLport ke nguna kos penyampau RM108 juta ditaga tembau ujung taun 2025.
Beduduk enggau nya, ba pengerami nya, Uggah bisi nyuaka geran projek neriki surau enggau masjid ngagai 11 iku pengari penerima di sitak Kunsil Nengeri (DUN) Bukit Saban ti manggai sepenyampau RM700, 000.-TVS
