KUCHING: Peminta nyereta program ‘Social Impact Accelerator’ tauka Penyampat Impak Sosial ti diatur Tabung Ekonomi Gagasan Anak Sarawak (TEGAS) diatu udah dibuka.
Chairman TEGAS, Datu Len Talif Salleh madah, program ngelama enam bulan tu setipak enggau juluk perintah nengeri ti deka ngangkat inovasi sosial enggau pengawa dagang.
“Sebedau tu, nengah program tu, kami bisi mantu lima kompeni sosial ari Kuching, Miri sereta Baram (Long Nen), enggau nyediaka akses ngagai mentor, pelabur, kaban ekosistem sereta akses pechuma ngagai Hab Inovasi Digital TEGAS di Kuching, Bintulu sereta Miri. Kompeni sosial tu nyengkaum Pungu Borneo, Jonita Enterprise, EdaBeran, SupaReaders enggau Timogah.”
Len Talif, ke mega Menteri Muda Pengawa Melin Mengeri, Pengatur Tanah enggau Rampa Menua, madah program nya dibuka ngagai kompeni sosial enggau dagang ti direjister baruh Komisyen Serikat Malaysia (SSM) sereta bisi pemadu kurang 31 peratus pemegai saham ari Sarawak tauka siku penengkebang kompeni ari Sarawak.
Timpuh operasi mega pemadu kurang enam bulan sereta enda lebih ari lima taun enggau bukti asil pengulih pelanggan.
Kompeni sosial ti berejister deka nitih siti ‘bootcamp’ tauka kem pematih ari September ngagai Oktober 2021.
Semina lima kompeni sosial ti dipilih tau nitih program ngelama enam bulan.
Program tu deka diatur ari November 2021 ngagai April 2022 begulai enggau Me.Reka – pampang pelajar ‘The Biji-Biji Initiative’ (TBI), ia nya siti kompeni sosial bepelasarka pemansang meruan ti ngena barang ti diubah baru enggau chara kreatif sereta kolaboratif.
Sida ke deka minta enggau program tu ulih ngelawa laman web http:bit.ly/TSIA2021.
