KUCHING: Kedai makai dikemendar nerima orang ke deka makai enggau ngirup ba kedai belabuh saritu.
Taja pia, pengempu kedai enggau sida ke gawa ba kedai mesti udah dituchuk, sekurang-kurang ia enggau dos keterubah vaksin COVID-19.
Komiti Mutarka Penusah Ngenyit Menua (SDMC) mansutka pemutus nya nemalam sepengudah sida ngaluska Atur Pengawa Standard (SOP) baruh Fasa Dua Pelin Mulaika Pemanah Menua (NRP).
Komiti nya madah, pemutus tu bepanggai mega ba gaya atur SOP bukai dalam FASA Dua NRP.
Sida mega meri lalau ngagai semua sektor ekonomi ti udah dikemendarka dibuka ngambika nitih SOP enggau terit laban opis bekuasa enda kakang ati ngukum orang ke ngelanggar SOP.
Pengempu kedai makai ke enda nitihka SOP deka diasuh nutup kedai ngelama 14 hari enti bisi kes positif COVID-19 nyadi ba kedai sida.
Sida mega diasuh nanggung kos meresa pengerai sereta nuchi kedai tauka premis sida.
Naka ke diatu, semina bistro belisin enggau kedai ti bisi endur nyedia pemakai ba dapur aja dikemendarka dibuka.
Kedai tauka premis makai enda dikemendarka bemain muzik tauka ngatur pengawa merindang lebuh maya ia buka.
Mensia mayuh ke deka nemu penerang bukai pasal SOP ulih ngelawa laman sesawang rasmi lalu penerang ulih diambi ari mlgh.sarawak.gov.my.
