KUCHING, 15 JULAI: Opis Betanam Betupi Bagi Menua Sri Aman nengah kerejasama Pertubuhan Peladang Kawasan (Ppk) Batang Lupar, Pantu Enggau Engkilili/Lubok Antu meri bantu bakul pemakai ngagai raban gawa di luan.
Program tu sebagi ari tanggungpengawa rama korporat kelai sukung ngagai pengawa raban gawa di luan ti bebendar dalam nagang pengekai igi penyakit Covid-19.
Bakul pemakai tu disuaka Menteri Muda Pengelantang Komuniti, Datuk Francis Harden Hollis ba tiga bengkah endur iya nya ba Palan Meri Vaksin (PPV) Dewan Suarah Sri Aman, PPV Dewan Komuniti MDLA Engkilili nyengkaum Ba SJR simpang Engkilili.
“Kitai agi beperang enda temu kemaya abis, nya alai rayat mesti nitihka sop ngambika ulih nagang pengekai igi penyakit seraya pengidup ulih pulai baka selama” ku iya.
Iya ke mega Kaban Council Nengeri (ADUN) Simanggang meri besai terima kasih ngagai ejensi ke bekaul ti besaup mantu sereta meri sukung ngagai raban gawa di luan.
Entara bantu ke diberi iya nya beras 5kg, jagung, rampo enggau barang pemakai ke bukai.
Bisi 90 bakul pemakai disua ngagai Dr Wong Jiat Yin ti ngarika raban gawa di luan ba PPV Dewan Suarah Sri Aman enggau 40 bakul pemakai ungkup PPV dewan Komuniti MDLA Engkilili diarika Dr Mohamad Ismail Bin Ahmad.
Enda tinggal mega, raban Polis, ATM enggau RELA ti bejaga ba pengawa ngempang jalai alun( SJR)) simpang Engkilili nerima 10 bakul pemakai ti diarika Sarjan Mejar Sen Sipi.
Sama bisi nyempulang Harden iya nya Encik Freddy Paul Giang Engie, Pemesai Opis Betanam Betupi Bagi Menua Sri Aman, Encik Mohd Ashree Wee, Pemesai Opis Pelilih Sri Aman, Menija Besai Ppk Batang Lupar Enggau Engkilili/Lubok Antu.
