KABONG, 20 April: Atur netapka baru nama Pesta Roban ngagai ‘Roban Food Festival’ (Pengerami Pemakai Roban) ukai semina meri penampak ke baru tang ngayanka agi potensyel pemakai asal di pelilih nya, ku Mohd Duri.
Kaban Kunsil Nengeri (ADUN) Kabong nya madah sitak Roban bepalan ba tengah-tengah menua DUN Kalaka, DUN Krian enggau DUN Kabong.
“Nya alai, komuniti ditu endang mayuh ngeluarka pemakai lokal ti digaga baru pemakai nya nyadi pematak temuai.
“Pengawa netapka nama baru (nama program) tu udah dipasuk dalam kalinda MCTP enggau enti suba dikumbai Pesta Roban tang taun tu diberi nama baru bagi Pesta Roban iya nya Roban Food Festival,” ku iya.
Mohd Duri mansutka jaku nya ngagai raban media pengudah aum pasal Roban Food Festival 2024 ba Opis Pelilih Kabong kemari.
Ku tandu iya, mayuh pengawa ngangkatmanah deka dipejalaika pengatur serak tu nyengkaum nambahka endur eksibisyen barang lama ba replika rumah panjai ti nyadi ikon pengerami nya.
Roban Food Festival 2024 deka diatur ba Pasar Roban berengkah ari 10 nyentuk ke 26 Mei tu.
Taun nyin kemari pengerami tu mujur matak urung 20, 000 iku temuai.-TVS
