KUCHING, Julai 13: Pemutus Sarawak ngalih ngagai Renggat Kedua Pelin Mulaika Pemanah Menua (PPN) enda digaga enggau berumban.
Pekara tu dipadahka Sapit Kepala Menteri Datuk Amar Douglas Uggah Embas lebuh iya ngelawa Palan Meri Vaksin (PPV) ba Klinik Bra’Ang Bayur di Jalai Puncak Borneo ditu maya hari dua.
Iya ke mega Chairman Komiti Mutarka Penusah Ngenyit Nengeri madah, pemutus nya bepanggai ba tiga penetap ti udah dikelai Kunsil Pengelikun Menua (MKN), iya nya penyampau kes diripot, kapasiti pengerai, sereta penyampau peratus rayat udah divaksin.
Nitihka statistik baru ti dipansutka dalam laman web vaksincovid.gov.my, 1,413,184 iku peranak di Sarawak udah nerima dos keterubah.
Penyampau tu 50.18 peratus ari semua peranak di menua tu ke dikemendar nerima vaksin.
Nangkanka nya, penyampau peratus tu udah ngelui kelai panggal pelasar (nilai ambang) 10 peratus ti ngulihka siti-siti menua dikemendar ngalih ngagai Fasa Kedua.
