Kuching, 13/07/2021 – Berambaika leka jaku “Adat Enggau Budaya Dikelala, Bansa Dipebasa” dalam Pekit Kumang enggau Keling 2021 YB Christopher Gira Sambang, pekit tu diatur nengah chara dalam tali arus.
Pekit tu narit ati 27 iku orang bujang enggau 43 iku indu dara ari serata menua Sarawak nguji deka ngulihka gelar Kumang enggau Keling.
Pekit tu entara kelai dikena ngintu Hari Besai, iya nya Hari Gawai. Pekit tu endang diintu ninting taun laban bansa Dayak endang tebilang enggau pengawa tradisional baka tu, ke alai pesereta deka ngayanka pekayan tradisional tauka ngepan sida empu nitihka ai tauka pelilih menua ti endang unik.
Berindik ari pandemik Covid-19 ti majak ngelekai ba menua Sarawak, pengatur program tauka Pekit Kumang enggau Keling dipeda kreatif laban sida ngatur pekit tu nengah chara dalam tali arus (online).
Pengawa milih bala pemekit ke mujur tama ngagai Top 20 (Semi Final) udah belabuh diatur lemai hari satu, iya nya 12 Julai, lalu deka disambung ngagai 13 Julai, pukul 7.30 lemai nengah chara Google Meet.
Pemutus bala pemekit ke mujur tama ngagai Top 20 (Semi Final) deka dipadah ngagai bala mayuh kena 16 Julai, pukul 7.30 lemai nengah laman Pekit Keling Kumang Piala YB Christopher Gira Sambang Taun 2021.
Ngarapka semua pesereta mujur dalam pekit tu.
