PADAWAN: Empat iku lelaki peranak menua tu ke dipelaba nyadi operator sebuah palan operasyen judi dalam tali arus di Kuching City Mall ba Jalai Penrissen-Stephen Yong, udah ditangkap maya Hari Satu.
Sapit Tuai Polis Pelilih Padawan, DSP Lim Jaw Shyong madah, operasyen nya dituaika ASP Omar ari Pampang Penasat Jenayah IPD enggau raban ari IPD Padawan.
Dalam operasyen nya, raban polis mujur nangkap empat iku lelaki beumur entara 20 ngagai 44 taun ba sebuah rumah dua tingkat ke endur sida ditangkap.
Operasyen nya mujur ngerampas lima iti laptop, 7 iti telefon binching sereta perengka bukai ti dikena sida bejudi.
“Sindiket tu dipelaba udah bejalaika pengawa bejudi nengah tali arus tu berengkah bulan empat 2020 nyentuk ke sida ditangkap kemari. Sindiket tu mega ngena bilik besai enggau bilik tinduk rumah nya nyadika palan judi,” ku DSP Lim Jaw Shyong lebuh dirandau pengarang berita TVS maya hari dua.
Asil tasat ari polis tetemuka laman web ti dipelaba dikena raban tu bejalaika aktiviti tu. Lebih kurang 15 laman web disidi. Sida mega ngena Whatsapp, Facebook enggau Telegram dikena ngelakuka aktiviti judi tu,” ku iya.
Ku Lim madah agi, aktiviti judi nengah tali arus tu dipejalaika 24 jam sehari lalu penyampau untung ti diulih sida manggai RM150, 000 sebulan.
Semua saspek ditangkap ngambika ditasat baruh Seksyen 4 (1) (g) Akta Rumah Judi Terbuka 1953.
