KUCHING: Rayat Sarawak dilalau meruan nyaga pengelikun diri taja pan Sarawak udah deka masuk ngagai Fasa Kedua Pelin Mulaika Pemanah Menua (PPN), pengudah varian Delta COVID-19 bisi dirikodka di nengeri tu.
Ku Menteri Kaunsil Kandang Menua Enggau Pengawa Berumah Datuk Seri Dr Sim Kui Hian, tiap iku rayat mesti nulung pangan diri ngambika ulih nagang pengelekai igi penyakit COVID-19 ari majak nambah.
“Taja pia, kami bedau ngemendarka sebarang pengawa begelumu tauka aktiviti rama ketegal varian Delta. Nya alai kitai patut tetap bejaga-jaga.”
“Nangkanka nya, sepengudah kitai muka baru ekonomi, ngarapka semua rayat terus nitihka SOP, seruran ngena sengkabung mua, nyaga seraka fizikal sereta suah masu jari,” ku iya.
Iya bejaku munyi nya ba siti penerang media beserimbai enggau Hari Sarawak 2021 ba Wisma Bapa Malaysia maya hari dua.
Sebedau tu, Sarawak bisi ngerikodka kes positif COVID-19 ti keterubah ngaul varian Delta, iya nya siku lelaki ke berumur 56 taun.
