KUCHING, 12 April: Inisiatif perintah Sarawak ti deka nyendiaka pelajar tinggi pechuma berengkah taun 2026 nyadi peransang ngagai apai indai enggau nembiak sekula ransing agi menatika pekara pelajar ngambika ulih nampung pelajar ba renggat universiti ti dipenggi Perintah Sarawak.
Ku Inon Hawel, 48 taun madah, iya bisi siku anak ti bisi juluk deka nampung sekula ba renggat universiti, lalu inisiatif perintah nengeri nya endang disambut sida sebilik enggau ati ti gaga sereta gagit.
“Inisiatif perintah nengeri tu chukup manah laban ulih meri peluang ngagai nembiak Sarawak belajar ba universiti ba ditu, enda ulih ngagai menua bukai.
“Pia mega, inisiatif baka tu ulih mantu ngelempungka tating belanja kami (apai indai) ke datai ari menua pesisir, ketebal agi ari rumah panjai,” ku iya madah.
Inon madahka, apai indai ti ngembuan anak ke bisi potensyel mujur dalam pekara pelajar mesti nguna manah peluang nya meransang anak sida bekenanas belajar.
Nangkanka nya, Monica Hawel, 30 taun madahka, nengah insiatif pelajar tinggi pechuma nya nembiak ba rumah panjai ti datai ari ruang bilik kurang penatai pemisi bisi peluang belajar ba universiti.
“Enti sida udah belajar ba tikas ke lebih tinggi, dudi hari sida bulih pengawa ke menyana sereta mantu nambahka tikas ekonomi ruang bilik diri,” terang Monica.
Siku pengajar ba SeDidik Idawati Diri madahka, inisiatif perintah ti nyendiaka bantu Endowment Fund Sarawak (EFS) penyampau RM1,000 ke diberi ngagai anak mit Sarawak ke baru ada enggau Bantu Indai Beranak (BIB) penyampau RM450 mandangka perintah nengeri menatika pengelantang rebak dudi enggau indu ti ngadaka anak.
“Bantu EFS nya ulih diguna dudi hari ba pekara pelajar anak enggau bantu BIB ulih nyukung indu ke baru beranak bebelika barang maya sida benung dalam timpuh bepantang sekalika ubat enggau barang ti dikena anak mit ke baru ada,” ku iya madah.
Sida tiga mansutka timbal penemu nya rambau dirandau pengarang berita TVS maya Pengerami Nyambut Pengabang Hari Raya Aidilfitri ti diatur Premier Sarawakm Datuk Patinggi Tan Sri Abang Johari Tun Openg ba Palan Konvensyen Borneo Kuching (BCCK) Hari Empat tu tadi.
Nitihka rikod, entara Palan Pelajar Tingi (IPT) dipenggi perintah Sarawak ti disadang deka bulih pemaik ari inisiatif tu ila iya nya Swinburne University of Sarawak, Curtin University Sarawak, Universiti Teknologi Sarawak, Kolej Universiti ICATS enggau CENTEXS. – TVS
