KUCHING, 10 April: Pemutus Kedu Kaban Parti Sarawak Bersatu (PSB) nyemilik Parti Demokratik Progresif (PDP) ngayanka penyerakup, pengering enggau pemanah iring tuai Gabungan Parti Sarawak (GPS).
Premier Sarawak, Datuk Patinggi Tan Sri Abang Johari Tun Openg madahka, nengah sukung ti rat diberi ngagai GPS, pemansang di Sarawak lebih mudah dilangkar enggau dipejalaika.
“Diatu PSB udah ngaku (nerima) polisi ti dipejalaika GPS.
“Nya pekara ke berat. Kitai di Sarawak ditu mesti beserakup ba baruh siti perabung ke sama,” ku iya madah ngagai pemberita di Rumah Terbuka Aidilfitri Premier Sarawak sehari tu tadi.
Abang Johari mansutka jaku nya maya dipinta meri timbal penemu pasal PSB ke udah direrak kena 7 April tu tadi ke mega dikemataka kedu presiden parti nya Datuk Seri Wong Soon Koh ke dichiri nyadi Mandal Presiden Kanan PDP.
“Pekara ke nyadi ngaul kedu parti penyakal nya mega mandangka iring tuai GPS amat ulih mai pemansang, pemaik enggau pengelantang ngagai Sarawak,” terang iya.
Nangkan ke nya, senentang dua kerusi Kunsil Nengeri (DUN) ti dipegai pengari rayat PSB, Abang Johari nerangka, isu nya ulih diputarka enggau manah ngaul sekeda sida ke bekaul.
“Pekara nya deka dibai dalam aum udah tu. Kami deka meda pengerembai ke nyadi.
“Ketebal agi, nya ngaul dua kerusi DUN (Bawang Assan enggau Engkilili) lalu tu bepanggai ba sida berunding,” tandu iya. -TVS
