SARATOK, 7 April: Penyereta ex-kaban Parti Sarawak Bersatu (PSB) masuk nyadi kaban Parti Demokratik Progresif (PDP) siti kelai ke chukup terang dalam politik iya nya orang ke kala dilaban ulih nyadi kaban.
Felo Kanan Kaunsil Profesor Menua Dato Dr Jeniri Amir madah, penyerakup kededua parti nya mandangka sida ngaga pemutus sebilik ungkup penegap politik di Sarawak.
“Tu siti pemutus ke betuju nyadi siti penemu pengeran sida ti deka sebilik.
“Pia mega negapka politik Sarawak, penyerakup enggau penegap tu chukup beguna dikena mantu ngerandang pemansang di Sarawak dibaruh iring ketuai ke dinamik enggau mega ngembuan runding ke jauh baka Premier Sarawak.
“Nyadi iya patut bisi sukung ke tegap enggau mega pengering ke dibai PSB, nyadi reti tu deka negapka agi sukung enggau pengering parti ti negika GPS,” ku iya.
Dr Jeniri ke mega siku pemikir politik di Sarawak madah munyi nya lebuh dirandau pengari TVS Saratok, Hari Minggu pasal penyereta ex-kaban Parti Sarawak Bersatu (PSB) masuk nyadi kaban Parti Demokratik Progresif (PDP).
Ku terang Jeniri, berita pemadu baru tu mega siti kelai positif ngagai politik dudi hari Sarawak dikena nentuka semua perambu Premier Sarawak Datuk Patinggi Abang Johari Tun Openg ulih bejalai enggau mujur.
“Udah tentu tu nambahka pengering ke udah bisi ba GPS ke udah menang 76 penuduk ba PRN sebedau tu sereta nengah pemulai ketuai ke dulu suba sama kala dalam perintah nyadi aku ngasaika tu utai ke manah meri kelai positif ngagai politik dudi hari di Sarawak.
“Sida (ex-Ketuai PSB) deka meri penegap, pengering… kitai deka ngatur nengeri tu dikena nentuka semua perambu ke udah dilangkar Premier Sarawak ulih dipejalaika enggau mujur enggau lebih ngasi laban diatu semina tinggal dua iku aja (penuduk) penyakal di DUN Sarawak,” ku iya.
Pemutus penyereta ex-kaban PSB nyadi kaban PDP dibantaika Presiden PDP Datuk Seri Tiong King Sing nyerumba Pengerami Malam Penyerakup ke diatur sebuah hotel tebilang di Sibu, Hari Enam.
Tuju pengerami malam nya diatur dikena ngelaluka bala ex-kaban PSB masuk PDP.-TVS
