KUALA LUMPUR: Kaban Gerempung Duit Turu Pengereja Pengawa (KWSP) ke beumur baruh 55 taun ulih mansutka duit sida nengah i-Citra berengkah ari 12 Julai 2021.
Beduduk ari nya, mensia mayuh tau ngenataika peminta nengah laman web icitra.kwsp.gov.my, iya nya tiga hari tumu agi ari timpuh ti ditetapka sebedau tu.
KWSP dalam siti penerang madah, dikena ngemudahka peminta nengah tali arus i-Citra, sida dilalau nentuka lumur telefon sebaka enggau rikod KWSP ngambika ulih nerima One-Time Password (OTP).
Sida ke minta bantu nya mega mesti bisi akaun bank ti agi aktif ngambika duit ulih diberi enggau mudah.
“i-Citra ngemudahka kaban ke patut ngeluarka duit turu KWSP sida nyentuk ngagai penyampau maksimum RM5,000 bepanggai ba laluh duit simpan dalam kedua-dua Akaun 1 enggau 2,” ku KWSP madah dalam siti penerang maya Hari Minggu.
Nangkan ka nya, penyampau duit i-Citra ti bulih pemendar deka dibayar lima kali iya nya sepenyampau RM1,000 sebulan bepanggai ba laluh duit simpan.
Bayar keterubah i-Citra dijangka dipasuk terus ke dalam akaun penerima ba pun bulan Ogos 2021.
Kaban KWSP tauka mensia mayuh ke deka nemu penerang silik senentang i-Citra sereta baka ni chara minta ulih ngelawa channel komunikasyen KWSP, laman web www.kwsp.gov.my, tauka betelefon ngagai lumur i-Citra di 03-8922 4848.
