SIBU, 11 Julai – Bemacham chara dipejalaika perintah dikena ngelengkaska agi program betuchuk vaksin di menua tu.
Tuju nya ngambika nadai siku ari rayat di menua tu sekalika di mengeri tauka menua pesisir tinggal ari nerima tuchuk vaksin COVID-19.
Sehari tu, sebuah bas mini betuchuk vaksin mindah kin kitu udah berengkah beoperasyen di Taman Harmoni Sibu.
Ku Menteri Muda Pengerai Mensia Mayuh enggau Pengawa Berumah Dr Annuar Rapaee madah, bas mini nya meri tuchuk vaksin COVID-19 ngagai sekeda pedagang enggau pedaja kedai makai ke besemak kandang endur nya.
“Sehari tu aku ba Taman Harmoni meri tuchuk vaksin mindah kin kitu iya nya nguna bas kerejasama entara PANSAR enggau Palan Servis DUN Nangka. Sehari tu kitai semina meri vaksin ngagai raban pedagang mit enggau sekeda pedaja ke bisi ba sebelah Taman Harmoni.” ku iya madah nengah laman Facebook maya hari minggu.
Dr Annuar madahka, semua sida tu deka diberi dos keterubah vaksin COVID-19 lalu sida ulih ngerejister diri sepengudah nerima tuchuk vaksin .
Bisi 70 iku orang ke nerima tuchuk vaksin nya lalu iya ngarapka pengawa nya ulih jampat sereta lanchar dipejalaika laban nama sida ke datai nya udah bisi disediaka lalu nadai bisi penanggul mensia mayuh besekut ba dia.
“Aku beterima kasih ngagai Taib laban udah senaka ulih ngelancharka program tu. Iya mega Chairman Pedagang Taman Selera Harmoni udah mantu ngemujurka pengawa tu lalu aku pechaya semua pedagang ba Taman Harmoni, MUC udah diberi vaksin.” ku iya madah agi.
Nangkan ke nya, iya ke mega Kaban Kunsil Nengeri Nangka madahka, enti sema betuchuk vaksin tu siti ari penetap lebuh deka minta lisin bedagang, semua pedagang ke udah betuchuk vaksin nya nadai napi sebarang penanggul dudi hari.
Iya mansutka jaku nya lebuh nurun ngemataka pengawa betuchuk vaksin dalam bas mini di Taman Harmoni maya hari minggu.
