KUCHING, 11 Julai: Ejensi Penerit Adat Maritim Malaysia Zon Miri mujur ngemuntanka aktiviti mai belalai 13,000 kampit beras, kena Hari Enam.
Pemujur tu berindik ari ripot mensia mayuh sereta nengah operasyen khas ngelingi tebing tasik Miri ke alai kapal kargo ti mai barang nya ditan ba penyauh 2.6 batu nautika ari Barat Tasik Tanjung Baram.
Direktor Zon Maritim Miri, Kapten Maritim Md.Fauzi Bin Othman madah, kapal kargo nya ditemu urung pukul 9.00 pagi.
“Asil peresa ditemu bisi 26 kuntina ngundan 13,00 kampit beras ari menua luar dianggarka 650 tan ti dipelabaka dibai belalai ke Miri deka dijual ditu nguna kapal kargo nya,” dalam penerang nya.
Pansik tumu, kapal nya direjista di Mongolia enggau kepenudi sangkai di Vietnam sebedau ditan maritim Malaysia.
Bisi dua iku peranak menua tu enggau lapan iku peranak Indonesia ditangkap ketegal ngereja penyalah ba baruh Ordinan Perkapalan Saudagar 1952 ketegal nadai mantaika dokumen tukar anak kapal (sign on enggau sign out) sereta ba baruh Akta Imigresyen 1959/63 nadai mantaika dokumen rejista tama enggau pansut menua luar.
Dianggarka barang ke dirampas beungkus RM3 juta.
Kes ditasat ba baruh Ordinan Perkapalan Saudagar 1952, Akta Imigresyen 1959/63, Akta Kastam 1967 Sereta Akta Chap Dagang 2019.
