SPAOH, 17 Mac: Komiti Penyanga Penusah Nengeri Sarawak (JPBNS) sehari tu mansutka jaku tangkan ngelalau rayat adap ke utara nengeri tu ngambika enda bejalaika pengawa nunu beduduk ari gaya hari ke balat angat.
Chairman JPBNS Datuk Amar Douglas Uggah Embas mega minta semua ejensi bekaul nyengkaum raban ari Opis Bomba enggau Penyah Penusah ngambika seruran ngadang sepanjai maya.
“Di utara Sarawak sida napi gaya hari ke chukup angat nyadi aku udah berandau enggau Komiti Penyanga Penusah Bagi Menua Miri ngambika ngadang napi musin kemarau di Miri.
“Maya musin kemarau tu suah amat nyadi penusah angus nyadi aku minta semua opis bejejaga nguna semua kereban pengangkut ke bisi dikena matau penusah angus,” ku iya.
Uggah ke mega Sapit Premier Sarawak madah munyi nya maya dipinta meri timbal bekaul enggau gaya hari ke chukup angat sepengudah tembu sebengkah pengawa ke diatur ditu kemari.
Berebak enggau nya, Uggah bisi madah diri enggai meda insiden angus nadai ditagang nyadi maya musin kemarau laban nya ulih ngujungka penyadi sebun.
Nangkan ke nya, Opis Meteorologi Malaysia (MetMalaysia) nengah sebengkah penerang apin lama madahka penyadi El-Nino di menua tu disadang deka terus nyadi nyentuk ke tengan taun tu.-TVS
