SPAOH, 17 Mac: Perintah Sarawak ngembuan program khas dikena mantu ngangkatka pengelandik kunteriktor Bumiputera Kelas E nyentuk Kelas C di nengeri tu.
Sapit Premier Sarawak Datuk Amar Douglas Uggah Embas madah, dikena ngemujurka juluk nya genap kunteriktor Bumiputera ke bisi ati masuk bidang nya tau nganjung peminta ngagai Opis Residen nitihka adres serikat diri empu ngambika diproses.
“Sida ke bisi ati (masuk bidang tu) ulih minta enggau berejister ba Opis Residen.
“Udah nya, Opis Residen deka nganjung peminta nya ngagai Opis Sekretari Pekara Wang Nengeri dikena milih sida ke patut masuk program tu,” ku iya.
Uggah madah munyi nya lebuh meri timbal bekaul enggau pemansang program khas bantu ngangkatka pengelandik kunteriktor Bumiputera Kelas C enggau E di Sarawak pengudah tembu sebengkah pengawa ditu, kemari.
Ku terang Uggah, sida ke mujur kena pilih deka diberi latih sereta bantu belanja kelimpah diberi perengkaguna ke bekaul.
Nya endang atur digaga perintah GPS dikena mantu kunteriktor Bumiputera ngambika sida ulih nyadi kunteriktor ke mujur di Sarawak.
Uggah mega madah program nya udah dipadah maya Aum Kunsil Nengeri Saawak bulan November 2023 dikena ngadaka kunteriktor Bumiputera ke landik sereta ulih besemekih di Sarawak.-TVS
