KUCHING, 8 Julai – Peranak di Kampung Tematu terus nerima bantu bekal pemakai sekali ke ari ejensi perintah, Gerempung Ukai Dikuasa Perintah (NGO) sereta Serakup Cina di pelilih Kuching.
Kampung Tematu, Kuching bejalaika Atur Nagang Pemindah Diteritka (PKPD) nyentuk ke 12 hari bulan tujuh tu.
Kaban Kunsil Nengeri Batu Kitang, Lo Khere Chiang madahka, sehari tu hari empat bekal pemakai baka beras, telu enggau bihun dianjung ngagai palan endur nyadung bantu pemakai di genturung pendiau nya.
“Ari kenyau PKPD diteritka ba genturung pendiau tu aku bisi meda sayur pun mayuh diberi, beras, sebedau tu sida madahka aku bekal telu enda chukup, tang sehari tu mayuh bekal telu udah datai. Telu udah chukup.” ku iya madah nengah laman Facebook iya maya hari empat.
Nangkan ke nya, Lo madahka sehari tu peranak di Kampung Tematu bejalaika peresa swab ti kedua.
Iya ngarapka pengawa peresa nya bejalai lanchar sereta genturung pendiau nya beresi ari pengekai igi penyakit COVID-19.
Kelimpah ari nya, Lo beterima kasih ngagai kerejasama ari semua kenyau ari PKPD diteritka di Kampung Tematu sereta peranak dia mega meri kerejasama ti manah ngagai raban gawa di luan sereta ngasika Standard Atur Pengawa (SOP) ke udah ditetapka.
“Laban sepemanjai timpuh COVID-19, PKPD di Kampung Tematu kita semua bekerejasama enggau aku lalu kitai semua meri perati ngagai pengelantang rayat di Kampung Tematu. Semua kitai enggau aku kenyau ari keterubah PKPD dipejalaika ba endur tu,” ku iya madah agi.
