KUCHING: Siku indu ke diripotka lari ari Palan Kuarantin COVID-19 ba Kolej Sains Kesihatan Bersekutu (KSKB) udah ditangkap semak enggau begunan Kastam, Jalai Field Force, Petra Jaya tengah hari kemari.
Sapit Tuai Polis Pelilih Padawan DSP Lim Jaw Shyong madah, dalam kes nya, saspek Roziela Mohammed Jaya ke beumur 31 taun, ditangkap enggau siku lelaki ke dipelaba pangan iya urung pukul 13 ngalih hari.
Saspek ngaku ngelarika diri ketegal bisi penanggul diau kediri ba palan kuarantin.
Lim madah, pengudah indu nya ngelarika diri, iya pan betelefon ngagai lelaki tadi.
Nitihka penerang Lim, saspek enggau lelaki nya udah diserah ngagai pengereja pengawa ba Palan Kuarantin COVID-19 KSKB, Jalai Puncak Borneo, ngambika atur ti patut ulih dipejalai.
Kes nya ditasat ba baruh Seksyen 269 Kanun Keseksaan enggau Seksyen 22B Akta Nagang enggau Nyeliah Penyakit Berampot 1988.
Sebedau tu, pesakit COVID-19 nya ditemu ngelarika diri ari palan kuarantin urung pukul 10.50 pagi Hari Dua (6 Julai).
