SARATOK, 13 Mac: Pekit Lumba Ensikal Krian Nature Challenge (KNC) diatu diganti enggau nama baru iya nya Krian Fest Nature Challenge (KFNC).
ADUN Krian Friday Belik madah kebuah nukar nama program nya laban deka meda program ke diatur taun tu ngembuan bungkur ke lebih besai lalu ukai semina numpu ngagai aktiviti lumba aja.
“Asil ari aum kedua tu tadi semua komiti udah setuju meri nama baru ngagai program tu iya nya dukumbai Krian Fest Nature Challenge 2024.3.13
“Udah nya, haribulan program tu diatur mega udah ditetapka iya nya kena 29 enggau 30 June 2024,” ku iya.
Friday mansutka pekara nya maya dirandau media pengudah tembu Aum Komiti Pengatur Krian Fest Nature Challenge 2024 betuaika Pegawai Pelilih Mit Nanga Budu, Hatta Adenan ba Bilik Aum Opis Pelilih Saratok, empai lama.
Antara aktiviti-aktiviti ke udah ditusun deka diatur nyerumba KFNC tu ila iya nya Kimpin Meri Darah, Beperesa Pengerai, Panggau Pemerindang enggau Mandangkan Main Asal, Pekit Manduk Pansuh, Pekit Nyura enggau ke bukai.
Renggat keterubah program tu diatur dikumbai Krian Mountain Bike XC Challenge ngerikodka penatai urung 2, 000 iku temuai.-TVS
