SARATOK, 12 Mac: Pekit Main Bol Tujuh Sepiak Trofi YB ADUN Krian ba Rumah Panjai Entinggie Tamin Krangan Saratok udah tu ila deka digaga nyadi Program Ninting Taun di Krian.
ADUN Krian Friday Belik madah, pekit nya diperati ulih nyadi siti pelasar ke chukup beguna dikena ngemansangka main bol kelimpah nyadi pelasar dikena ngempung bala nembiak di Krian.
“Kitai meda sida iya taja padang enda menyana tang sida ngembuan pengeliat ati, mandangka pengelandik bemain ba padang ke baka tu.
“Semangat baka tu ke digiga kitai iya nya rindu bemain, besemekih enggau pangan diri lalu sida tu mih orang dikeandal ngemansangka nengeri tu dudi hari,”ku iya.
Iya madah munyi nya maya bejadika pengawa nangguhka Pekit Main Bol Tujuh Sepiak diatur Biro Nembiak Rumah Entinggie Tamin, Krangan Saratok empai lama.
Bisi 24 buah tim ari dalam enggau luar Saratok bisi ngambi bagi ba pekit ke diatur dua hari berunggu nya.
Rambau pekit nya mensia mayuh ke bisi datai bepeluang meda pengelandi ex-pemain bol Sarawak, Joseph Kalang Tie ke bemain enggau tim FC Marakas.
Sama bisi datai ngemataka pekit nya Senator Pele Peter Tinggom, ADUN Meluan Rolland Duat Jubin, Residen Betong Richard Michael Abunawas enggau Pemangku Pegawai Pelilih Saratok, Laga Kueh.-TVS
