LIMBANG, 4 Mac: Opis Menteri Pengerai Malaysia (KKM) diansak patut lengkas agi ngaga Klinik Long Napir ungkup pemaik komuniti Penan ke diau di menua ulu.
Kaban Kunsil Nengeri (ADUN) Batu Danau Dato Paulus Palu Gumbang madah projek ke tejanggal dua kali nya enda ulih digaga nyentuk ke sehari tu beduduk ari suntuk belanja enggau penanggul teknikal ke bukai.
Ku terang Paulus, Klinik Pengerai Long Napir endang sempama seput ngagai komuniti lebih agi sida ke diau di menua ulu enggau pelilih menua ke semak laban ke nadai klinik bukai ke semak nya.
”Aku endang ngarap amat projek tu (digaga) laban tu endang siti (perengkaguna) ke pemadu beguna ngagai sitak Batu Danau.
“Kitai sama nemu deka mai pesakit undur ari Long Napir nya ngambi awak pengelama tiga setengah nyentuk empat jam nengah jalai batang.
“Nyadi bisi sekeda kes pesakit nyau nadai (madamka seput) ba rantau jalai maya ke sepital nyadi klinik tu beguna amat ngagai kitai lebih agi rayat di menua ulu ba kandang Long Napir,” ku iya.
Iya mansutka jaku nya maya dirandau media pengudah Pengerami Makai Selamat Nyerumba Hari Ruang Bilik 15 Komiti Pemansang enggau Pengelikun Genturung Pendiau (JKKK) Sitak Ukong diatur ba Pelaman Rumah Penghulu Ekit Awang, Kampung Bukit Gudang, Hari Minggu tu tadi.
Paulus mega madah, peminta ngaga Klinik Long Napir endang antara pekara ke suah dikenataika maya Aum Kunsil Nengeri (DUN) Sarawak enggau Aum Parlimen kenyau ari taun 2006.
Projek ke dirandaka rayat menua pesisir nya udah dikemendar dalam Langgur Pemansang Malaysia Lumpar Kesepuluh (RMK-10) ungkup menua Limbang enggau kos lebih RM3 juta.-TVS
