BALINGIAN, 3 Mac: Perayat lebih agi sida ke diau ba rumah panjai mesti ngubah chara berunding seriris enggau segang pemansang dunya moden.
Menteri ba Opis Premier Sarawak, Dato Sri John Sikie Tayai nyemetak madahka, ambika chunto chara bumai kelia enda sebaka enggau chara baru ti dikena orang kemaya hari tu.
“Suba enti bumai pengawa keterubah dikereja kitai baka nebas, nebang, nunu, betambak, nugal, mantun tauka ngintu padi sebedau ulih diketau.
“Tang diatu dikena nambahka asil bumai kitai diatu mesti nguna penemu, pengelandik sereta teknologi baru,” ku iya madah rambau dikangau ngulu Program Aspirasi Minda SDGA ti diatur ba Rh Petrous Ambun, Lubok Bukut, Balingian Mukah, Hari Enam tu tadi.
John Sikie nerangka, enda ngira nama bansa pengawa ke dikereja komuniti Dayak di menua pesisir diatu mesti bisi nilai ekonomi, tauka bisi daya meri asil penatai pemisi ti nguntungka rayat.
“Pia mega, enti bala kita deka ngaul diri ba pengawa nupi jani enggau manuk mesti ransing agi ngambika ulih dijual sechara komersial. Laban diatu rega manuk enggau jani nyau majak mar sereta nerima peminta ke tinggi ba makit lokal,” tandu iya.
Taja pia, iya madahka dikena ngerembaika pasal pengawa ti meri penguntung begunaka puku sekalika ba renggat mit tauka besai.
“Anang takut ngeluarka puku ti nyema kita deka bulih untung dalam sesebengkah pengawa.
“Diatu kitai meda rega jani ke dijual sekilo semak RM40 ke RM45 sekilo, pemadu murah ba taka RM30 sekilo.
“Anak jani diatu mega mar ti nyema kita deka meli. Ti jani tuai indu enggau lelaki semak RM600 ke RM700 siku,” ku tambah iya.
Pengerembai bukai, iya ke mega Kaban Kunsil Nengeri (ADUN) Kakus endang nyambut manah program ke diatur SDGA ti menatika pasal pemansang enggau pengelantang komuniti Dayak di menua pesisir. – TVS
