KAPIT, 2 Mac: Pemujur ti dijapai master tauka tebangkar nenun pua Bangie Embol ke udah nerima Anugerah Tukuh Kraf Menua 2024 empai lama mandangka orang ke mendam di menua ulu mega ulih nempa nama ba tikas menua enggau dunya dalam bemacham bidang.
Anugerah nya disuaka Menteri Besai Datuk Seri Anwar Ibrahim nyerumba pengerami Hari Kraf Nasional (HKK) 2024, lalu nya entara pengaku pemadu tinggi diberi Perintah Malaysia nengah pemendar Kabinet Menteri taun 1996.
Pemujur Bangie Embol ngangkatka tenun pua ngagai tikas antarabansa patut diteladan
Kaban Kunsil Nengeri (ADUN) Baleh, Nicholas Kudi madahka diri gaga laban Bangie asal ari Rumah Gare, Sungai Kain Baleh Kapit udah ngaul diri ba pengawa nenun lebih ari 40 taun seraya ngemegah nama sida di Kapit.
“Bangie udah mujur ngangkatka penampak nama kitai Sarawak enggau Malaysia ba mata dunya lebih agi ngarika komuniti Iban.
“Asil bekau jari Bangie ba pengawa ngaga kraf lebih agi tenun Pua Kumbu mantu nyagu pemanah, pengalus sereta penyelai produk nya ba tikas ke pemadu tinggi sereta dikelala orang ba serata dunya,” ku iya madah rambau ditelefon pengarang berita TVS hari Lima tu tadi.
Kudi nerangka, sebedau tu Bangie pan kala nerima bemacham anugerah ba renggat nengeri enggau menua tu sereta suah bulih numbur dalam pekit ti bekaul enggau Pua Kumbu.
“Berekat ari pengeransing ke ditunjukka iya dalam bidang seni kraf tenun pua, ba taun 2000, ngujungka Krafjari Malaysia udah nyiri iya nyadi Adiguru Kraf Tenun Pua,” ku iya.
Nya alai, iya andal amat rebak baru enggau dudi ketebal agi sida ti bisi bakat enggau pengerindu ngaga kraf neladan pemujur Bangie ke dulu ngerandang jalai ngambika ulih dititihka bala bukai jemah.
Nitihka rikod, entara motif tenun pua ke suah diasilka iya baka Bungai Rang Jugah, Bungai Buah Sepuyong enggau Bungai Bali Malikut.
Asil pengelandik jari ti digaga iya chukup manah sereta Bangie bulih bemacham anugerah sereta pemujur dalam bidang kraf baka Anugerah Adiguru ti diatur di menua Iran lalu bulih lumur tiga Anugerah Pua Kumbu. – TVS
