KUCHING, 26 Feb: Perintah Sarawak udah setuju enggau perambu Serakup Gerempung China Bagi Menua Kuching, Samarahan sereta Serian dikena matak Universiti Shanghai Fudan ari China numbuhka kampus pampang universiti nya ba nengeri tu.
Premier Sarawak Datuk Patinggi Tan Sri Abang Johari Tun Openg madahka, enggau penumbuh kampus nya ila, pekara nya deka meri mayuh pilih ngagai anak Sarawak ti deka nampung pelajar ngagai tikas ti lebih tinggi.
“Aku deka kampus tu dibuka ba Sarawak laban universiti tu iya nya universti kelima ti pemadu manah di China.
“Diatu, Sapit Premier Sarawak Datuk Seri Dr Sim Kui Hian benung ngatur aum enggau raban China sereta kitai mega ngarap perintah Sarawak enggau China ulih nempa kerejasama bejalaika pengawa nya,” ku iya.
Abang Johari mansutka penemu nya rambau Pengerami Makai Lemai Taun Baru China enggau Penumbuh Serakup Gerempung China Bagi Menua Kuching, Samarahan, Serian Ke -45 Taun.
Iya mega nyuaka geran tanah bagi kandang endur urung lima ekar enggau turu penyampau RM15 juta dikena ngaga sekula baru iya nya Sekula Sekondari Chung Hua No 4 kuching sereta agih belanja penyampau RM5 juta enggau tanah urung tiga ikar ngagai Kaunsil Amanah Amal China Sarawak dikena bejalaika mayuh agi pengawa bekaul pekara pengelantang.-TVS
