SERIAN, 25 Feb: Unit Pekara Pengarap Bukai (UNIFOR) taun tu udah nerima agih belanja sepenyampau RM110 juta ari perintah nengeri.
Sapit Premier Sarawak Datuk Amar Douglas Uggah Embas madahka agih belanja nya ke besai nya mandangka penyiru perintah nengeri dibaruh iring Premier Sarawak Datuk Patinggi Abang Johari Tun Openg dalam menatika pengelantang semua jalai pengarap ke bisi ditu.
“Nyadi baka ti dipadahka aku tadi Premier Sarawak kitai iya nya tuai ungkup semua rayat ba nengeri tu. Mayuh udah pemujur ke udah nyata dipeda.
“Keterubah, iya udah ngungkupka penyampau RM110 juta ngagai Unit Ungkup Pekara Bukai (UNIFOR) dikena mantu gerija, tepikong sereta rumah sembiang bukai ke ukai pengarap Islam,”ku iya.
Uggah ke mega Menteri Bekuasa Ngagai UNIFOR mansutka jaku nya rambau bejadika Program Serumpu Makai Lemai diatur Gerempung Tuai Komuniti enggau Tuai Raban Bansa Iban Bagi Menua Serian malam tadi.
Ku tandu Uggah agih belanja ke udah dikemendarka nya ukai semina betuju mantu gerija, tepikong enggau rumah sembiang bukai ke ukai pengarap Islam aja.
Tang mega mungkur belanja dikena mantu semua sekula misyen di nengeri tu.
Sama bisi ngulu program nya Menteri Pelajar, Inovasyen Enggau Pemansang Bakat Sarawak, Dato Sri Roland Sagah Wee Inn, Sapit Menteri Industri Pemakai, Komoditi enggau Pemansang Wilayah Sarawak, Datuk Martin Ben sereta Sapit Menteri Dagang Temuai, Industri Kreatif enggau Seni Pemerindang, Datuk Snowdan Lawan.-TVS
