BETONG, 24 Feb: Atur meri insentif tambah ngagai raban orang bumai di nengeri tu endang pengawa ke patut, ku Dato Sri Stephen Rundi Utom.
Menteri Industri Pemakai, Komoditi Enggau Pemansang Wilayah Sarawak Dato Sri Stephen Rundi Utom madah, insentif tambah ke diberi perintah nengeri berindik ari rega minimum padi penyampau RM1,300 ari perintah besai nya betuju dikena matak pengerindu sereta meransang orang bumai chakah agi bejalaika pengawa bumai.
”Enti suba semina RM750 setan, lalu diatu ditiki RM1,300.
“Nya alai, enti kami (Perintah Sarawak) meri mimit insentif nya ulih matak pengerindu rayat ba nengeri tu bumai.
“Pia mega, aku udah bulih penetap ari Premier Sarawak enggau Perintah Sarawak sereta engka kami ulih ngerembaika pekara tu ngagai bala pekebun enggau orang bumai di nengeri tu,” ku iya.
Iya mansutka jaku nya rambau dirandau pemberita pengudah bejadika Program Randau Pemansang Industri Lada ba Rumah Panjai Joseph Sanda, Jambu Kerampak di Layar ditu kemari.
Dulu agi ari nya, Rundi enggau Sapit Premier Sarawak, Datuk Amar Douglas Uggah Embas mujur bejadika kelai pengawa nanam tambak lada ba kebun lada dipenggi Umtam anak Jentau sebedu ngulu Program Randau Pemansang Industri Lada ba Rumah Joseph Sanda.
Entara aktiviti ke bisi diatur nyerumba program tu iya nya Taklimat Bantu Enggau Insentif Ungkup Pekebun Lada, Taklimat Insentif Bantu Kereban Mesin Ungkup Pedagang Industri Utai Tanam enggau Taklimat Chara Betul Nguna Rachun Sereta Pemansut Lada.-TVS
