KUCHING, 21 Feb: Kedu Tuai Pemegai Menua Sarawak Tun Pehin Sri Abdul Taib Mahmud siku tuai sekalika orang politik ke udah bendar gawa ungkup pemansang ba menua kitai di Sarawak.
Dekan Fakulti Sains Sosial enggau Kemanusiaan ba Universiti Malaysia Sarawak (UNIMAS) Profesor Dr Neilson Ilan Mersat madahka niang Tun Taib tu siku orang ke ngemunka pemansang di nengeri Sarawak ti ngujungka nadai taka entara mengeri enggau menua pesisir.
“Berita pemidang iya nya endang sigi ngasuh kitai teguran sereta sinu ati ukai semina kitai di Sarawak tang pia mega rayat di Malaysia lebih agi raban tuai-tuai enggau politik ke ngelala sereta udah kala gawa enggau iya.
“Tun Taib tu siku ari tuai sekalika orang politik ke udah bendar gawa ungkup pemansang di menua kitai di Sarawak. Nya alai diatu baka ke dipeda kitai menua Sarawak nyadi sebuah nengeri ke mansang, ngembuan penyerakup sereta ngembuan timpai ke jauh bekau ari iring iya ke nyadi tuai menua,” ku iya.
Nangkan ke nya ku Dr Neilson niang Tun Taib ukai semina nyadi Kepala Menteri kitai di Sarawak kenyau ari taun 1981 menya tang sebedau nya 60-an enggau 70-an sigi udah enggau orang gawa megai kuasa sekalika ba Perintah Besai.
Kelimpah ari nya ku iya madah niang tu ngembuan peneleba ke mayuh ngujungka pemansang nyegang ngagai mengeri enggau menua pesisir. – TVS
