KUCHING, 21 Feb: Berita sinu ti diterima pagi tu madahka kedu Tuai Pemegai Menua (TYT) Nengeri Sarawak, Tun Pehin Sri Abdul Taib Mahmud udah midang urung pukul 4.40 pagi tadi.
Nampung berita ari Unit Komunikasi Awam Sarawak (UKAS), tubuh niang dijangka datai lemai tu ari Kuala Lumpur sereta deka terus dibai ke rumah iya di Demak Jaya, Jalai Bako.
Nangkan ke nya, tubuh niang deka dibai ngagai begunan Kunsil Nengeri (DUN) kena 22 Februari (Hari Empat) ngambika bala mayuh ulih meri basa kepenudi berengkah ari pukul 8 pagi nyentuk ke 11.30 pagi.
Udah nya, tubuh niang deka dibai ke Masjid Demak semak enggau rumah niang ngambika disembiang sebedau dikubur nitihka adat nengeri ba pendam di Demak Jaya.
Beduduk enggau nya, perintah Sarawak netapka timpuh ngulit di selampur nengeri belabuh ari sehari tu enggau pagila seraya menira Sarawak ditikika setengah tiang.
Semua chara rasmi ti ngaul program pemerindang dilanjarka dulu.
Masjid enggau rumah sembiang diperansang ngatur program sembiang dikena ngenang pemidang Tun Taib.
Pia mega, perintah Sarawak meri penyinu ari ngagai semua sida niang Tun Taib sebilik.
