PUSA, 17 Feb: Projek Transformasyen Servis Bas Tambang di nengeri tu deka dipejalaika enda lama agi.
Sapit Menteri Pengangkut Malaysia (MOT) Datuk Hasbi Habibollah madah, jam ke diatu projek nya udah ba renggat mansutka tinda ungkup operator di selampur Sarawak.
“Kebendar sebarang transformasyen bas tu kitai nemu perintah dibaruh LPKP mih baka di Sarawak tu iya nya dibaruh MOT.
“Pia mega senentang program SBST tu mega udah digaga ba sekeda nengeri di Semenanjung enggau ba Sarawak diatu benung dalam proses tinda,” ku iya.
Hasbi mansutka pekara nya rambau aum media pengudah Program Bantu Lesen Deriba MyLesen (B2) ungkup sitak Parlimen Batang Lupar ditu, pagi tadi.
Ku tandu Hasbi, iya ngarapka projek nya deka mujur dipejalaika dikena ngemanah agi servis kereban pengangkut mensia mayuh ba Sarawak.
“Tu kebendar bantu ari Perintah Besai ngagai raban operator bas tambang awakka sida ulih terus nyendiaka perengkaguna ngagai rayat ditu.
“Servis bas (tambang) ba nengeri tu, enda tentu meri untung ba dedini endur. Ukai semina ba menua kitai aja ba menua luar pan sebaka.
“Nyadi nya mih pengawa digaga perintah kitai dikena nentuka servis nya bisi ungkup rayat kitai,” ku iya.
Taja pia ku Hasbi, program nya semina deka dipejalaika ba mengeri besai di selampur menua.
Ke penerang, ba taun 2023 urung RM17 juta udah diagih ungkup program transformasyen servis bas tambang ba Sarawak.-TVS
