BINTULU, 15 Feb: Penatai pemisi Sarawak disadang deka terus nambah bekau ari pemujur perintah Gabungan Parti Sarawak (GPS) ngempu Autoriti Penyangkai Kapal Bintulu.
Premier Sarawak, Datuk Patinggi Tan Sri Abang Johari Tun Openg madahka, pengelama 43 taun Penyangkai Kapal Bintulu ba baruh kuasa Perintah Besai lalu berengkah bulan June taun tu ila penyangkai kapal nya deka diempu penuh Perintah Sarawak.
“Dalam taun 2024 tu kitai udah bisi sekeda pemujur ke meri penambah ngagai asil penatai pemisi nengeri sereta nyendiaka peluang gawa ke meri gaji ke besai ngagai rayat lokal.
“Nya alai, kitai mesti ngangkatka tikas pelajar bala anak awakka ulih nangkup pengawa ti bisi disediaka di Bintulu,” ku iya madah rambau Program Rumah Tebuka Taun Baru China ke diatur DUN Tanjung Batu enggau SUPP Pampang Bintulu.
Abang Johari nerangka, semua peluang gawa ke meri gaji besai nya begunaka pekereja enggau bakat ti bisi penemu enggau pengelandik nguna teknologi.
Berindik enggau nya, iya madahka perintah GPS udah merambu berengkah taun 2026 ila deka meri pelajar tinggi pechuma ngagai anak Sarawak senutuk enggau langgur pemansang ekonomi nengeri.
“Pelajar pechuma tu diberi ngagai sekeda universiti ke dipenggi perintah Sarawak,” tandu iya.
Ku iya madah, inisiatif meri pelajar tinggi pechuma nya ukai pekara ti dipasuk ba dalam manifesto pengawa bepilih sebedau tu, tang iya deka bejalaika inisiatif nya ungkup pemaik anak Sarawak ke enda ibuh nyadi aku janji. – TVS
