SARATOK, 8 Feb: Kaban Kunsil Nengeri (ADUN) Kalaka, Mohd Duri nesau mensia mayuh ditu patut bejalaika tanggungpengawa ngerejister diri lengkas ba Pangkalan Data Besai (PADU).
Ku iya, bepelasarka ripot ke diterima naka 1 Februari tu tadi semina urung 8, 444 iku aja ke udah ngerijester diri ba sistem PADU di Saratok.
“Aku ngarapka orang Saratok ke udah tau rejister ba PADU patut bejalaika tanggungpengawa diri.
“Anang kelalu mending ke jerita ke enda menuku pasal PADU,” ku iya.
Tandu ita, mensia mayuh ba Saratok ke deka rejister ulih ngelawa Palan Ekonomi Digital (PeDi) enggau Opis Pemadah Nengeri (JAPEN) Pampang Saratok.
“Kitai bisi nyendiaka dua palan endur mantu rejister ungkup mensia mayuh iya nya ba PeDI enggau JAPEN Saratok.
“Nya alai, arapka mensia mayuh bela datai ngusung palan nya,” ku iya maya meri timbal pasal penyampau orang ke udah rejister ba Pangkalan Data Besai (PADU) di Saratok rambau ngulu Pengerami Anugerah Kolej Pom Enam Saratok Ke-19 ditu, pagi tadi.
Ungkup penemu tuju PADU ditumbuh dikena ngelala penerang senentang sosio ekonomi ruang bilik di menua tu.
Tu mega dikena nentuka bantu ke diberi perintah datai ba raban ke diselinting dudi hari.- TVS.
