BETONG, 8 Feb: Sekula Primari (SK) Nanga Gayau ditu deka bisi ngembuan Pelaman Gempuru enggau jalai baru tama nuju sekula nya deka digaga nengah agih belanja sepenyampau RM600,000.
Sapit Premier Sarawak, Datuk Amar Douglas Uggah Embas madah, agih ungkup kededua projek nya datai ari Projek Transformasyen Menua Pesisir (RTP) enggau Ejensi Pemansang Bagi Menua Betong (BDDA).
“Jalai baru nuju kitu (SK Nanga Gayau) udah dikemendar nengah agih belanja RM 300,000 ari Projek Transformasyen Menua Pesisir (RTP) enggau alu mega udah minta raban JKR berundingka chara pemadu manah endur bejalaika projek nya ila ari sukut pengelikun,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya maya bejaku ba Pengerami Apresiasi Nembiak SK Nanga Gayau ditu, kemari.
Nangkan ke nya, Uggah mega madah agih sepenyampau RM300,000 mega udah dikemendar dikena nyemin pelaman sekula awakka lantang alai bala nembiak begempuru.
“Udah nya siti iya nya dikena nyemin pelaman ba mua sekula tu ke ulih muat endur urung tiga nyentuk empat ratus iku nembiak sekali begempuru nyadi kitai udah ngemendarka agih sepenyampau RM300, 000,” ku iya.- TVS.
