BETONG, 3 Feb: Raban orang dagang lebih agi sida ke asal ari Spaoh diperansang pulai ke menua lalu besaup ngangkatka agi pemansang ba pelilih nya.
Kaban Parlimen Betong, Dr Richard Rapu madah, penatai sida chukup beguna dalam nyungkak sektor ekonomi di Spaoh ngambika ulih seriris enggau mengeri bukai ke udah jauh mansang.
“Juluk ati aku deka meda bala tauke ke asal ari Spaoh bela mulai ke diri ngagai menua lalu besaup ngemansangka Spaoh.
“Enda patut kitai semina nengkila orang luar aja beambi ulih munyiku Sapit Premier Sarawak Datuk Amar Dr Sim Kui Hian.
“Tang kitai deka meda bala taukey bela besaup muka mayuh dagang ba Spaoh,” ku iya.
Dr Richard mansutka pekara nya maya Pengerami Ngedut Kaul Gong Xi Fa Chai 2024 di Spaoh malam tadi.
Ku iya, nyema semua pedagang bela seati dia pengawa nya dikeandal ulih meri pangka manah ngagai pemansang ekonomi perayat ba sitak Spaoh.
Sama bisi ngulu pengerami Sapit Premier Sarawak Datuk Amar Douglas Uggah Embas enggau bini iya, Datin Amar Doreen Mayang, Sekretari Politik Premier Sarawak, Roselind Mapong Sabai enggau ke bukai. -TVS
