DEBAK, 1 Feb: Taun tu bisi 34 buah Projek Transformasyen Menua Pesisir (RTP) deka dipejalaika ba sitak Kunsil Nengeri (DUN) Saribas.
Kaban Kunsil Nengeri (ADUN) Saribas, Datuk Mohd Razi Sitam madahka, projek nya ngaul mayuh macham ejensi pengatur ti deka mekuhka ngagai pemansang infrastruktur enggau prasarana nyengkaum ngemanah jalai kebun ba sitak nya.
“Ungkup taun 2024 tu, kitai bisi 34 iti projek dalam rintai ungkup dipejalaika ba taun tu.
“Projek nya ungkup semua genturung pendiau, rumah panjai nyengkaum kebun mega dalam rintai ke ngaul infrastruktur nya.
“Tu projek ngaduka jalai, sistem parit ke ngaul sekeda ejensi pengatur baka JKR, DID, kaunsil lokal ti deka bejalaika projek tu,” ku iya.
Iya bejaku munyi nya pengudah Pengawa Nyerahka Baru Taba Projek Ngagai Pengani ba Rumah Panjai Seli Ali, Munggu Tunggal, ditu empai lama.
Razi mega madahka projek nya ti diberi kena 12 Disember taun tu tadi mujur ditembuka urung sebulan lebih tumu ari haribulan ke udah ditetapka iya nya kena 5 Februari tu.-TVS
