SIBU, 28 Jan: Pengawa nyerahka taba ungkup 10 Projek Jalai Kebun ba sitak Kunsil Nengeri (DUN) Krian ke dibaruh patau Ejensi Pemansang Menua Betong (BDDA) deka diatur minggu baru, 5 Februari tu.
Kaban Kunsil Nengeri (ADUN) Krian Friday Belik madah, semua projek nya beungkus RM6.5 juta mungkur sitak Lempa, Awik, Ulu Krian, Kabo enggau Ulu Sebetan.
“Kitai deka nyerahka taba (projek) begulai enggau ejensi pengereja pengawa ungkup taba projek ke udah ditetapka.
“Pengawa tu diatur 5 Februari, minggu baru lalu ba renggat keterubah kitai udah ngemendarka 10 buah jalai kebun di DUN Krian.
“Nengah agih sepenyampau RM6.5 juta nyadi 10 palan tu udah dikelala kitai bepelasarka peminta ke udah diterima ari rayat Krian sereta mega langgur penemu ke udah dibantaika Opis betanam Betupi,” ku iya.
Friday madah munyi nya maya Pengerami Ngintu Taun Baru China 2024 diatur Parti Demokratik Progresif (PDP) Pampang Dudong ditu, malam tadi.
Sama bisi datai Presiden PDP Dato Seri Tiong King Sing, Presiden PSB Dato Sri Wong Soon Koh bala ketuai PDP enggau PSB sereta bala kaban kededua parti nya.
Tandu Friday, urung RM10 juta udah diagih dikena ngemujurka projek ke sama ba renggat kedua tang diatu agi ba proses ngiga taba projek nya.-TVS
