KUCHING, 26 Jan: Ex-Yang di-Pertua Dewan Negara Tun Dr Wan Junaidi Tuanku Jaafar sehari tu nerima surat chiri nyadi Tuai Pemegai Menua (TYT) Nengeri Sarawak ari Yang di-Pertuan Agong Al-Sultan Abdullah Ri’ayatuddin Al-Mustafa Billah Shah di Istana Negara, Kuala Lumpur.
Pengawa beradat nyuaka surat chiri ngagai TYT Nengeri Sarawak nya bela digulu Menteri Besai, Datuk Seri Anwar Ibrahim enggau Premier Sarawak Datuk Patinggi Tan Sri Abang Johari Tun Openg.
Beduduk ari nya Wan Junaidi, 78, nyadi TYT Nengeri Sarawak kelapan nampung Tun Pehin Sri Abdul Taib Mahmud.
Al-Sultan Abdullah mega setuju meri tanda pangkat Darjah Kebesaran Seri Maharaja Mangku Negara ke mai gelar Tun ngagai Wan Junaidi ba pengawa ke sama.
Iya dipelaba deka angkat sumpah mangku pengawa nya nengah sebengkah pengerami diatur ba Kunsil Nengeri Sarawak ditu kena 29 Januari.
Ex-kaban politik ke chukup tebalan tu ada ba di Sadong Jaya kena 1 Februari 1946.
Pangku pengawa kepenudi Wan Junaidi sebedau dipadu nyadi TYT Nengeri Sarawak iya nya Yang di-Pertua Dewan Negara.
Ngelansa pejalai politik iya, Wan Junaidi kala nyadi Kaban Parlimen Batang Lupar berengkah 1990 nyentuk 2004 sebedau betukar ngagai sitak Parlimen Santubong nyentuk iya pinchin taun 2022.
Iya endang kaban Parlimen ba dua sitak tu pengelama 32 taun bekau ari pemujur iya pengelama tujuh kali Pengawa Bepilih Besai.
Iya mega kala nyadi Sapit Speaker Dewan Rakyat berengkah 28 April 2008 nyentuk 3 April 2013.
Dalam Kabinet Perintah Besai, iya kala mangku sekeda tanggungpengawa besai baka nyadi Sapit Menteri Dalam Menua berengkah 16 Mei 2013 nyentuk 29 Julai 2015.
Iya udah nya diberi pengandal ngiring siti portfolio dalam Kabinet Perintah Besai nyadi Menteri Pengeraja Asal enggau Rampa Menua kena 29 Julai 2015 nyentuk 10 Mei 2018.
Kena 10 March 2020 nyentuk 16 Ogos 2021, iya dipadu nyadi Menteri Pemansang Pedagang enggau Gerempung Kerejasama.
Iya mega diberi pengandal nyadi Menteri ba Opis Menteri Besai (Parlimen enggau Undang-Undang) berengkah 30 Ogos 2021 nyentuk 24 November 2022.-TVS
