KUCHING, 25 Jan: Perintah Sarawak ba baruh iring Premier Datuk Patinggi Tan Sri Abang Johari Tun Openg mekuhka pemansang pelajar enggau bakat ti ngaul nembiak di selampur nengeri tu.
Bemacham program enggau inisiatif ke udah, benung enggau deka dipejalaika perintah ungkup pemansang anak Sarawak ba dalam mayuh bengkah bidang ti tau nguntungka sida jemah.
Beduduk enggau nya, Profesor Linguistik Terapan (Professor of Applied Linguistics) Akademi Pengajian Bahasa, Universiti Teknologi Mara (UiTM) Kota Samarahan, Prof. Dr. Bromeley Philip madahka, apai indai sereta nembiak patut sama enggau ngerebut peluang nengah sukung ke bisi disediaka perintah nengeri enda ngira dalam aspek pelajar, bakat sereta pengelandik.
“Berengkah ari taun 2026, perintah Sarawak deka nyendiaka pelajar tinggi pechuma ungkup anak Sarawak.
“Semua peluang tu endang dibuka ngagai semua anak Sarawak nyengkaum di kandang menua pesisir.
“Nya alai, anak kitai ti pandai dalam pelajar sereta bisi pengingin deka nampung pelajar ke tikas universiti patut ngambi peluang tu,” ku iya madah rambau ditelefon pemberita TVS lebuh Hari Empat.
Entudi ke nya, Dr. Bromeley nerangka nembiak tauka anak ke mujur dalam pelajar muntang bulih peluang gawa ke lebih manah dudi hari, nerima gaji ti besai sereta tau amat nyaup ngangkatka tikas pendiau pengidup sida di menua.
Iya ke nyadi siku tebangkar dalam Institusyen Pelajar Tinggi Perintah (IPTA) bansa Iban nyambut manah inisiatif perintah Sarawak ti deka nyendiaka pelajar tinggi pechuma ngagai anak Sarawak berengkah taun 2026.
“Polisi tauka inisiatif nya betuju deka mantu ngelempungka tating belanja bala apai indai ke kurang penatai pemisi,” tandu iya.
Iya mega pechaya inisiatif nya nyadika peransang ngagai apai indai ransing agi nganjung anak sida nampung pelajar ngagai tikas kolej tauka universiti di menua tu jemah. – TVS
