MIRI, 2 Julai – Emart Riam Miri diatu udah sedia nyadi Palan Meri Vaksin Industri ((PPVin) ti ngembuan kapasiti 1000 dos sehari.
Penumbuh palan tu mega dijangka ulih mantu pengempu pengawa dagang ke bisi pekereja sida diberi tuchuk vaksin seraya enda nganti PPV ke udah bisi.
Ku Kaban Parlimen Sibuti, Lukanisman Awang Sauni madah, pekara nya disukung serakup pedagang enggau business chamber di Miri ke besedia deka nentuka pekereja menua tu enggau pekereja menua luar jampat agi nerima tuchuk vaksin.
“Tu iya nya penambah ngagai PPV ke udah bisi di pelilih Miri tebal agi di mengeri Miri kitai bisi tiga PPV. PPVin tu nyadi tanggungpengawa peminta mayar semua ungkus operasyen enggau pengatur. Tang, vaksin ke diberi pechuma ari perintah iya nya ari Opis Menteri Pengerai (KKM).” Ku iya madah ngagai pengarang berita TVS maya hari lima.
Lukanisman madahka, Komiti Mutarka Penusah Ngenyit Bagi Menua (JPBB) Miri madahka, Emart Riam deka berengkah bejalaika operasyen enda lama agi seraya KKM benung nyendiaka bekal vaksin ke deka dianjung ke palan nya.
Bekaul enggau program betuchuk vaksin di parlimen Sibuti, iya madahka, semua rintai nama ke udah dianjung tuai peranak ngagai pegawai pelilih udah diberi tuchuk vaksin magang.
“Taja pan pia, kitai chakah bejalaika raban betuchuk vaksin mindah kin kitu ngelawa orang ke enda ulih mindah ari rumah enggau udah berengkah meri vaksin ngagai pekereja ba ladang sekalika pekereja ari menua tu empu enggau pekereja ari menua luar.
Nangkan ke nya, ku iya madah, bepelasarka PPV ke bisi ba kandang menua Subis iya nya ba Bekenu, Sepupuk enggau tiga buah klinik pengerai ke ngembuan kapasiti 2,600 dos sehari.
