DEBAK, 21 Jan: Raban orang ke tasah bah sereta ngenduh ba Palan Pengenduh Sementara (PPS) Diwan Millena enggau Diwan Perpaduan di Debak udah dikemendar pulai ke rumah diri empu pengudah kededua PPS nya ditutup rasmi pukul 12.00 tengahari tadi.
Maya dirandau pengari TVS, siku ari sida ke tasah Nur Adnin Zaini madah diri beterima kasih ngagai Petara laban udah ulih pulai enggau deka mupuk meresi rumah ke balat kamah laban bah.
“Puji Tuhan ai bah udah surut lalu barang mega udah diadu magang semina barang dalam rumah endang abis rusak baka peti ais, sofa, mija makai, nyentuk pintu nyau tebabak.
“Ampuh bah serak tu mih pemadu mayuh rugi, suba kala kena ampuh bah tang enda balat baka tu agi bisi barang ulih bai,” ku iya.
Sebedau tu, dua bengkah PPS nya alai mindahka urung 364 iku raban ke tasah bah ari tiga buah genturung pendiau iya nya ari Kampung Lalang, Kampung Bungey enggau Kampung Babu.-TVS
