DEBAK, 20 Jan: Mensia mayuh ke tasah ketegal ampuh bah di Debak ditangkan patut nentuka rumah sida likun sebedau bekejang ninggalka rumah ngagai Palan Pengenduh Sementara (PPS).
Tuai Polis Balai Debak, Sarjan Bedindang Nyambang madah, sida ke tasah patut nentuka semua suis besai ba rumah udah ditutup lalu pintu rumah mega mesti dikunchi dikena nyeliahka barang sida ari kena churi.
“Aku ngelalau mensia mayuh nyema tikas ai majak niki patut madah jampat ngagai raban ejensi ke bekaul ngambika ulih ngatur sida pindah.
“Taja pia sebedau nya patut tentuka karan ditutup enggau mega rumah dikunchi manah ngambika nadai orang beambi ulih baka enchuri barang maya ke ditinggalka,” ku iya.
Iya madah munyi nya maya dirandau seninjik ngabas Palan Pengenduh Sementara (PPS) di Dewan Millenea Debak, kemari.
Nangkan ke nya, Bedindang mega ngelalau bala ejensi patut nyaga penglikun diri maya ngesah penusah enggau mindahka raban orang tasah ngagai Palan Pengenduh Sementara.
Naka tu, bisi 148 iku raban orang tasah ari tiga buah genturung pendiau iya nya Kampung Lalang, Kampung Bungey enggau Kampung Babu di Debak udah dipindah ngagai PPS nya.
PPS kedua di Diwan Perpaduan Debak mega udah dibuka urung pukul 3.00 lemai Hari Lima.-TVS
