DEBAK, 18 Jan: Opis Menteri Pengerai Malaysia (KKM) udah ngagihka belanja sepenyampau RM500, 000 dikena ngemanahka Sepital Saratok.
Sapit Menteri Pengerai Datuk Lukanisman Awang Sauni madah, kelimpah dikena bejalaika projek ngemanah sepital agih belanja nya mega deka dikena nukar atap sepital bekaul ke udah luya.
“Ungkup Sepital Saratok kitai udah ngemendarka agih sepenyampau RM500, 000 ungkup pengawa ngemanah enggau nukar atap laban udah mayuh tuduh .
“Nyadi, tu mih dikumbai proses Bintara Madani dikena ngemanah perengkaguna perintah,” ku iya.
Lukanisman mansutka pekara nya maya pejalai gawa ngabas Klinik Pengerai Debak, kemari.
Nangkan ke nya, ku Lukanisman di Saratok perambu endang mungkur semua iya nya perintah deka ngaga klinik sereta ngemanah sepital ke udah bisi ngambika bisi servis lutur tebangkar dudi hari.
Ngelansa senentang isu suntuk mesin hemodialisi di Sepital Saratok, dia Lukanisman madah, KKM ngembuan formula enggau mekanisme dikena mutarka penanggul nya.
Jam ke diatu, Sepital Saratok semina bisi lapan buah mesin hemodialisis dikena merubat urung 45 iku pesakit ti dibagi ngagai tiga renggat ungkup sekali berubat.
Berebak enggau nya, bisi 44 iku agi pesakit benung nganti gintir diri diperubat ba palan servis hemodialisis sepital nya.-TVS
